Mohabbat Ka Teri Banda Har Ek Ko Ae Sanam Paya
Brabar Gardan e Shah o Gada Dono Ko Kham Paya

Ba-rung e Sham'a Jis Ne Dil Jalaya Teri Doori Mein
To Us Ne Manzil e Maqsood Ko Zair-e-Qadam Paya

Baja Karte Hain Ashiq Taaq-e-Abroo Ki Parastaari
Yahi Mehraab e Dair o Ka'aba Mein Hum Ne Kham Paya

Hazaaron Hasraten Jaavengi Mere Saath Duniya Se
Sharaar-o-Barq Se Bhi Arsa-e-Hasti Ko Kam Paya

Siwaye Ranj Kuch Haasil Nahin Hai Iss Kharabe Mein
Ghanimat Jaan Jo Araam Tu Ne Koi Dam Paya

Nazar Aaya Tamaasha-e-Jahan Jab Band Kein Aankhein
Safa-e-Qalb Se Pehlu Mein Hum Ne Jaam-e-Jam Paya

Jalaya Aur Maara Husn Ki Nairang Saazi Ne
Kabhi Barq-e-Ghazab Us Ko Kabhi Abr-e-Karam Paya

Hua Hargiz Na Khatt-e-Shoq Ka Saaman Durust Aatish
Siyahi Ho Gae Nayab Agr Hum Ne Qalam Paya